Mondyal 2022: chanm otèl Lionel Messi t ap dòmi nan peyi Kata pral tounen yon mize.
Qatar University de Doha se la ekip foutbòl Ajantin lan te fè tout tan l pandan mondyal 2022 a nan peyi Kata. Enstitisyon an anonse jodia chanm kote Lionel Messi t ap dòmi an pral tounen yon mize nan semèn k ap vini la, se sa medya fransè RMC Sport rapòte atravè yon atik li pibliye sou sit li maten an.
Chanm sa Lionel Messi te pase tan l pandan yon mwa gen 2 kabann byen senp, yon biwo, yon televizyon figi plat, yon kanape. Aprè atakan PSG a fin ranpòte mondyal la, responsab espas la deside transfòme chanm foutbolè a an mize pou moun ka vin vizite.
Kote ansyen jwè Baselòn lan t ap dòmi an gen yon “écusson” ak non l ki ekri sou pòt chanm lan ki se nimewo B201.
Okenn dat poko bay kilè mize sa ap louvri pou moun ka vin vizite.
N ap raple w Lionel Messi ak koyekipye l yo pèmèt Ajantin ranpòte twazyèm mondyal li aprè 36 lane blanch. Albiceleste a nan seyans penalite kont ekip Fransèz la chanpyon nan peyi Kata.
Pou kounya Messi nan vakans li ta dwe tounen nan PSG koumansman janvye k ap vini la daprè anpil medya etranje.
