Polis Nasyonal Ayiti a kontinye ap konte kadav

1 minute, 11 seconds Read

Anba je gwo chabrak k ap fè politik Makyavelik an Ayiti, pitit mas la ap kontinye tonbe

Polisye Govin Roulls tonbe anba kout bal okenn moun pa rive idantifye nan Delmas 31 Pòtoprens Ayiti, pa twò lwen lakay li. Se Kowòdonatè Inyon Nasyonal Ofisye Polis Ayisyen yo atravè SYNAPOHA Lionel Lazarre, ki konfime enfòmasyon an lendi 19 desanm 2022 a.

Ajan 4 la te plase nan Direksyon Administrasyon Penitansye (DAP) pou sèvi peyi a nan fason pa l, malerezman bandi yo etenn souf li epi yo pote ale machin li ki se yon RAV4 ane 2006, plak BB44524, toujou selon SYNAPOHA.

N ap note, Govin Rolls ki te fè pati 19èm pwomosyon polis la se yon nouvo viktim nan kan polis nasyonal peyi AYITI a, ki vin ogmante lis la, ki pase definitivman a 53 polisye ki deja mouri anba bal pou sèlman lane 2022 a.

N ap raple, jiskaprezan Direktè akademi polis la, komisè divizyonè Rigaud Harrington ki te tonbe anba bal 25 novanm pase a, pa ko janm jwenn jistis. Èske menm jan ak komisè Rigaud, DG Frantz Elbe ap kontinye voye senpati l bay fanmi polisye Govin san bay bandi malfra yo yon repons pwopòsyonèl ?

Antouka, nan yon sosyete kote menm sila ki fòme pou pwoteje ak sèvi mas pèp la pa an sekirite, sa tradwi aklè nan ki dimansyon sityasyon yo nan sosyete sa an degradasyon.

Joseph Cenes, Centre à la UNE

Lot atik